Astrolabiu

La mio pequeña patria infantil nun diba muncho más p’allá de la contorna d’una casería, Cortielgos, que llevada n’arriendu, aseguraba’l pan de la mio familia. Tres de Casa, la Tierra’l Xabú, Les Corraes, Les Baragañes yera la xeografía cotidiana de les mios espediciones de curtiu percorríu. Emblemáticos llugares que mudaben de cara con cada estación pero que siguen inalterables na mio memoria peñeraos por un tiempu irrecuperable.

Descubriendo, día a día, los aperios qu’abellugaben múltiples tendeyones supe del esfuerzu compartíu poles manes familiares garraes a los arbíos: esmesón, garabatu, mesories, goxa, macona…

Al otru llau d’unos montes, qu’identificaba con figures animales cuando la nieve llendaba claramente les contornes, tendría d’esistir un mundu desconocíu y un mar inabarcable.

Dellos llibros y dalguna revista espertaben el mio interés y espardíen la mio imaxinación viaxera per tan pequeñu territoriu. La mio querencia polos mapes débo-yla, mayormente, a aquelles publicaciones y a la temprana llectura de La Isla del Tesoro, de R. L. Stevenson.

Na escuela descubrí que la mio familia falaba una llingua diferente a la de la maestra y decidí entós convertir a mio güela, sufrida campesina, na lexicógrafa qu’ellaboró’l mio primer diccionariu espiritual.

Descubrí’l mar, viaxé y quixe describir el mundu cola ayuda del diccionariu heredáu. Un universu que me lleva una y otra vez a un pequeñu territoriu onde los caminos s’entecrucen, los sentimientos s’asemeyen, les llingües se confunden, los ritos perduren, la piedra soporta’l pasu del tiempu…

Della vez contemplé unos guapos astrolabios nel Museu de Marinha de Belém, en Lisboa y reparé na so etimoloxía. Del griegu “astron”, astru, estrella y “lanbanien”, tomar, buscar; dalgo asina como “buscador d’estrelles”.

Aquellos inxeniosos artiluxos conteníen nun pequeñu espaciu tol universu y gracies a ellos, astrónomos, astrólogos y marineros podíen conocer les distancies, midir el tiempu y orientase. Acababa de descubrir el secretu de los mios desvelos lliterarios.

L’astrolabiu de la mio escritura asítiase n’Asturies, un universu nel que la bruma poques veces dexa ver les estrelles. Ayudáu polos mapes de la memoria, los restos materiales e inmateriales d’una cultura campesina que s’esvanez, el paisax y dalguna estrella que m’alluma ente la bruma, trato de tresmitir la emoción d’un territoriu pequeñu pero universal.

Dende la poesía, la etnografía, el mediu natural, la historia o cualquier otru estadiu del conocimientu quiero compartir los mios sentimientos porque al fin y al cabu el mundu nun ye tan grande como pa que nun podamos alcontramos.