lunes, 12 de diciembre de 2011

POQUES LLUCES


Cuenta la prensa estos díes que les nuestres ciudaes apuesten pola escuridá aforrando n’illuminación navideña. Faen comparances con otros años, ente lo que gastaba tal o cual Ayuntamientu y critiquen a dalgún qu’otru que sigue marafundiando presupuestos nestos menesteres, cola que ta cayendo.
Tamién dicen que vagamos atristayaos per esos centros comerciales mirando de regüeyu pa los escaparates ensin atrevemos a escoyer allegremente aquello que nos ofrez, tamién allegremente, el mercáu. La crisis ye negra como boca de llobu.
Qué llástima que tengan que llegar estes feches, tan afayadices pa la señaldá y les bones intenciones pa que dellos s’alcuerden del despilfarru y de lo inxusto d’un capitalismu que nos echa l’anzuelu del consumismu y, darréu, tíranos dando les bocaraes al cestu de la indiferencia.
Agora les nuestres ciudaes y les nuestres vides viven na escuridá como si d’una maldición se tratare como si nunca nadie habitare no escuro.
El paráu suaña de nueche con un trabayu “indignu” pa poder mantener a la familia. L’emigrante busca una lluz abrazáu al destín d’una patera nel procelosu mar. A lo fonderu del pozu d’agua del Tercer Mundu nun s’asoma la lluna. Nel cuartu escuru, la muyer nun ve la cara del torturador, solo siente’l dolor y el mieu. Una mano anónima pide nuna esquina debaxu d’una farola ensin lluz…
La inxusticia y la desigualdá siempre habiten no escuro, ente les sombres, la indiferencia y l’olvidu.
Faen falta más lluces, sí, pero non como les de los adornos navideños sinón de les qu’allumen la conciencia pa poder ver los rostros del especulador, del corruptu, del que mueve los filos de la economía a les sos deleres como telaraña mortal. Del que dende’l poder adoctrina al humilde col mieu y afalaga al que más tien.
Nes altes torres, bien illuminaes, de cualquier “city”, áxiles deos téclien sobre un ordenador d’ultima xeneración y van apagando les lluces del mundu mientres la buena xente prende una humilde vela qu’allarga les sombres y, adulces, se consume.

4 comentarios:

  1. Tardas en escribir el el blog, pero cuando lo haces la verdad es que conmueves a todo el que te lee.
    Nunca dejas de sorprenderme,eres magistral utilizando las palabras adecuadas para expresar lo que muchos sentimos y no sabemos trasmitir nada más que con enfados y frases subidas de tono.
    Todo lo que pasa por tu "pluma" lo conviertes en auténtico arte.
    sigue deleitándonos aunque sea de tarde en tarde.
    safo

    ResponderEliminar
  2. Así es, tal y como lo describes. Te aplaudo Ánxel.
    Un fuerte abrazo.

    ResponderEliminar
  3. El capitalismo nun funciona y en rusia escogense asi mismos...mientras crece la desigualdad al amparo de la hipocresia.

    ResponderEliminar
  4. Gracies, Anxel: por estos rellumos de lluz que nos regales. Como siempres, maraviyosu testu y magnífiques reflexones. Puedes tener l'absoluta certidume de que nenguna de les palabres que tu escribes cuerre'l riesgu de cayer al cestu de la indiferencia.
    Un abrazu.
    P.V.

    ResponderEliminar