martes, 10 de julio de 2012

Mineros


Negro, el carbón ye negro como’l futuru que casi ye presente. La llarga filera proyecta una solombra  que s’esvanez cuando un sol d’inxusticia algama lo más alto cayendo a plomo sobre la carretera.
Nos fríos despachos, con aire acondicionao, solo cuadren los númberos pa los banqueros, el pozu ensin fondu y ensin castillete.
La solombra volverá mañana, n’otru amanecer inciertu pa ti, pa mi, pa ellos que quieren allumar la conciencia adormecida de los dóciles cola escasa lluz del focu. Polifemos acabante salir de la cueva del desencantu, la rabia y la impotencia. Mancaos pola llanza de los malos arreglos, del engañu. Mineros.
El modernu Ulises nun se llama “Naide”, viaxa en coche oficial, con priesa, nun s’escuende debaxo la barriga de les oveyes y nun hai Poseidón que-y corte’l pasu.
Mineros somos toos, atrapaos na escuridá  del eufemismu que quier poner nome agradable a la indignidá, al atropellu, a la miseria. Solo una voz pa los oyíos sordos d’un poder que como’l grisú te proporciona una muerte dulce, ensin que t’enteres.
Una sola voz que, como’l turullu de la mina, t’arrespigue, cambie’l relevu y apague’l run-run d’axustes, copagos, recesión, austeridá… Caxigalines.
Qué llamen a les coses pol so nome. Austeridá ye nun poder allegar un cachu pan a la boca.
Eses llargues solombres que s’esvanecen pela carretera escuenden un corazón rebelde como nun podía ser d’otra manera. Mineros.







5 comentarios:

  1. Bravo Ánxel! Arrespígome al leelo. Un abrazu.

    ResponderEliminar
  2. ¡Que grande yes, Anxel! Nadie como tú ye capaz de desnudar —con tanta sensibilidad— una realidad tan penosa.

    ResponderEliminar
  3. UFFFFFFFFFFFFFFFFFFFFF
    SAFO

    ResponderEliminar
  4. Que acertado y que bien lo dices !!!

    ResponderEliminar
  5. Genial Anxel, me gusta mucho tu forma de contar una realidad tan próxima y la forma de describir a los mineros.

    ResponderEliminar